1 janari ka nisur me një tjetër krim në familje, duke tronditur kryeqytetin. 34-vjeçari Klajdi Shundi ka vrarë me thikë në qafë kunatin e tij 42-vjeçar Vladimir Zvezhda. Ngjarja ka ndodhur në lagjen “5 maji” në kryeqytet në orën 3:45 të mëngjesit të 1 janarit.
Autori e kishte burrin e motrës viktimën Vladimir Zvezhda. 42-vjeçari me gruan kishin shkuar për Vit të Ri në shtëpinë e autorit. Pasi janë zënë brenda apartamentit kanë dalë të dy jashtë në hyrje të pallatit dhe aty 42-vjeçari është qëlluar për vdekje me thikë në qafë.
Policia ka arrestuar autorin, i cili ka qenë në gjendje të dehur kur ka ndodhur krimi.
Data 31 dhjetor u mbyll me një ngjarje tronditëse, pasi 59-vjeçari Përparim Ademi vrau bashkëjetuesen e tij dhe motrën e saj, pas disa konflikteve familjare.
Vrasja e dy motrave në zonën e “Astirit” që tronditi dje Tiranën. Kristina Bardhi, 53 vjeç dhe Zhaneta Metanit, 45 vjeç u vranë dje me automatik nga 59-vjeçari Përparim Ademi dhe vazhdimi i lidhjes me një prej motrave duket se ka qenë motivi i krimit të dyfishtë.
Policia në vendngjarje gjeti 26 gëzhoja kallashnikovi, armë me të cilën autori kreu vrasjen. Pas krimit autori e la armën në apartament me karikator të zbrazur dhe u largua më këmbë. Dy orë nga ngjarja ai u kap pranë shkollës Vasil Shanto në Tiranë.
