Ka shkuar në 6 numri i të infektuarve nga Coronavirusi në vendin tonë, pasi 4 persona që iu ishin nënshtruar analizave rezultuan pozitiv.
Nga rezultatet e 14 testimeve të kryera në laboratorin e virologjisë në Institutin e Shëndetit Publik, rezulton se 4 persona kanë rezultuar pozitiv për COVID-19, 3 prej tyre janë familjarët e 28-vjeçarit ose siç është identifikuar ndryshe si ‘pacienti zero’.
Ndërsa rasti tjetër i konfirmuar gjatë ditës së sotme, është një 31-vjeçar me banim në Tiranë, i cili po ashtu ka patur histori udhëtimi në Milanon 6 ditë më parë dhe është kthyer pas një qëndrimi të shkurtër 1 ditor në vendin fqinj.
Mësohet se ata ndodhen jashtë rrezikut për jetën, teksa ndodhen në karantinën e vendosur tek Infektivi në QSUT.
Në total janë testuar 77 raste, ndërkohë të gjithë personat e tjerë që kanë patur kontakte me të infektuarit po mbahen në vetëkarantinim të detyruar dhe po ndiqen nga ekipet e epidemiologëve për gjendjen e tyre shëndetësore.
Ministria e Shëndetësisë ka ftuar të gjithë qytetarët të ndjekin me kujdes rekomandimet zyrtare dhe të kujdesen posaçërisht për masat e higjienës personale.
Ndërkohë për çdo rast të shfaqjes së shenjave të infeksionit respirator, si temperaturë, kollë, vështirësi në frymëmarrje, sidomos për personat që kanë histori udhëtimi me vendet e prekura apo kanë pasur kontakt me ta, Ministria e Shëndetësisë dhe Mbrojtjes Social bën thirrje të lidhen me Urgjencën Kombëtare në nr. 127.
Deri më tani, në rang global janë shënuar 111,000 të infektuar dhe janë regjistruar 3,900 viktima, në më shumë se 100 shtete.
Kina, qendra e epidemies, ka pësuar një rënie të numrit të të prekurve, por tashmë situate paraqitet alarmante në Europë, teksa prek ditësh OBSH ka bërë thirrje për masa emergjente.
