Vijon të thellohet bilanci i të prekurve nga Coronavirusi, teksa ka shkuar në 3599 numri i viktimave në rang global, ndërsa 105,000 njerëz janë infektuar, shumica e tyre në territorin e Kinës.
Të prekur janë regjistruar në një pjesë të madhe të shteteve, ndërsa gjendja më alarmante paraqitet në shtetin fqinj, Itali, ku kanë humbur jetën 233 persona, ndërsa 5.883 të tjerë janë infektuar.
Në këto kushte shteti italian ka përforcuar masat, duke ndaluar hyrje-daljet nga rajoni i Lombardisë.
Masa ekstreme për Coronavirusin në Itali: Izolohen 15 milionë banorë, ndalohet kryerja e funeraleve
Fatmirësisht, në vendin tonë nuk është regjistruar ende asnjë i infektuar, megjithëse mjekët kanë hedhur hipotezën se mund të ketë të prekur, por nuk po shfaqin simptoma.
Nga ana tjetër, strukturat shëndetësore po vijojnë testimet për COVID-19, për çdo rast të dyshuar në Laboratorin e Virologjisë pranë ISHP, ku sipas njoftimit të fundit në total janë testuar 59 raste, por të gjithë kanë rezultuar negativ.
Personat e dyshuar kanë shfaqur shenja të infeksionit respirator dhe kanë vizituar vende të prekura nga virusi, teksa rastet e testuara deri tani i përkasin kryesisht: Tiranës, Shkodrës, Durrës, Fierit, Lezhës dhe Vlorës.
Në njoftim nga ISHP thuhet se Spitali Infektiv do të menaxhojë rastet e para, me një staf të përcaktuar dhe të trajnuar dhe në varësi të numrit të rasteve janë përcaktuar spitalet COVID 1 dhe COVID 2 si dhe spitalet dhe stafi mjekësor ku do të zhvendosen pacientët ekzistues.
Në 24 orët e fundit në të gjitha pikat kufitare në total kanë hyrë 23,035 udhëtarë, të cilët kanë qenë në survejancën e përforcuar për monitorimin e temperaturës, ndërsa në 24 orët e fundit në nr. 127, ka patur 1391 thirrje.
Edhe një herë, Ministria e Shëndetësisë u ka bërë thirrje personave që kanë udhëtuar nga rajonet e prekura dhe që kanë patur kontakte me persona të sëmurë apo të dyshuar për COVID-19 të vetëkarantinohen për një periudhë 14 ditore.
