Ka shkuar në 51 numri i të infektuarve me koronavirus në vendin tonë.
Zv.ministrja e Shëndetësisë, Mira Rakacolli bën me dije, se në 24 orët e fundit janë kryer 31 teste, nga të cilët 9 kanë rezultuar pozitiv.
Në mesin e tyre janë një mjek dhe tre infermierë të spitalit “Shefqet Ndroqi”, të cilët kanë qenë në kontakt me një pacient të prekur nga koronavirusi.
Ata ndodhen në gjendje të mirë shëndetësore dhe janë vetëkarantinuar.
Pacienti që i infektoi, kishte takuar një të afërm, i cili kishte ardhur nga Italia, fakt të cilin ia ka fshehur mjekëve.
Në total deri më tani janë bërë 563 teste, nga të cilat 51 kanë rezultuar pozitiv.
Deklarata e Rakacollit
“Në vijim të punës së kujdesshme dhe profesioniste të bërë nga ISHP dhe njësitë e kujdesit vendor, për identifikimin dhe gjurmimin e rasteve, në 24 orët e fundit janë testuar 31 persona të dyshuar, qytetarë dhe personel shëndetësor, prej të cilëve janë konfirmuar 9 raste të reja me COVID-19. Deri në këto momente janë testuar 563 raste të dyshuara dhe prej tyre janë të konfirmuar pozitivë me COVID-19, 51 raste:
Nga rastet e konfirmuara pozitivë:
Tiranë 34 raste
Durrës 5 raste (njëri prej të cilëve ka ndërruar jetë)
Lushnje 2 rast
Elbasan 2 raste
Fier 6 raste
Rrogozhinë 2 raste
Prej tyre:
20 janë të shtruar në spitalin Infektiv (nga Tirana, Durrësi, Fieri, Lushja dhe Rrogozhina).
Prej tyre janë në terapi intensive tre qytetarë, njëri prej të cilëve në respiracion të drejtuar.
Ndërsa pjesa tjetër e të shtruarve në pavion janë në gjendje të stabilizuar deri në këto momente.
Në vijim të HETIMIT TË HOLLËSISHËM EPIDEMILOLOGJIK të filluar ditën e djeshme në spitalin “Shefqet Ndroqi”, kanë dalë pozitiv edhe 4 raste personel shëndetësor (një mjek dhe 3 infermierë) të cilët kanë qenë në kontakt me pacientin, i cili aktualisht po trajtohet në spitalin infektiv dhe që, më herët ka qenë i shtruar në spitalin “Shefqet Ndroqi”.
Siç ju kemi njoftuar, nga gjurmimi i kryer, ky pacient është vizituar në spital nga një i afërm që vinte nga Italia, dhe që NUK E KA DHËNË KËTË INFORMACION TEK STAFET MJEKËSORE.
Personeli është në gjendje të mirë shëndetësore, PA SIMPTOMA dhe i vetëkarantinuar.
Instituti i Shëndetit Publik po vazhdon pa u ndalur hetimi epidemiologjik dhe testimi i rasteve të dyshuara.
Nisur nga sa ju informuam, dua të përsëris edhe një herë thirrjen për qytetarët:
Telefononi në numrin 127!
Jepuni informacion të hollësishëm stafeve mjekësore!
Nëse mbani të fshehtë informacionin e lëvizjeve tuaja nga personeli shëndetësor, rrezikoni të infektoni personelin dhe të afërmit tuaj.
SOT ËSHTË DETYRIM që të mbrojmë personelin shëndetësor.
Ju lutem qytetarë: Shmangni vajtjet direkte në spitale.
Qëndroni në shtëpi!
Respektoni rregullat e reja!
Një thirrje sidomos për të moshuarit mbi 70 vjeç: Ju lutem mos dilni nga shtëpitë!
Qeveria ka ndërmarrë një sërë masash për parandalimin e përhapjes së koronavirusit.
Transporti publik është ndërprerë, gjithashtu edhe qarkullimi i makinave private.
Më herët janë mbyllur lokalet dhe shkollat, ndërsa prej ditësh në rrugë ka dalë ushtria dhe policia, për të mbikëqyrur zbatimin e urdhërave të policisë.
