Ka shkuar në 12 numri i të prekurve nga koronavirusi në Shqipëri.
Mësohet se njëri nga të infektuarit është një i moshuar në Lushnje.
Gjatë orëve të fundit ndërkohë janë kryer 157 analiza.
Të dhënat e fundit janë bërë me dije nga zv. Ministrja e Shëndetësisë, Mira Rakacolli.
“Janë kryer 43 testime të reja, kanë rezultuar pozitive vetëm 2 raste. Njëri prej tyre është i lidhur me rastin e parë, tjetri një i moshuar në Lushnje që ka udhëtuar nga Bergamo. Të dyja rastet janë në vetë izolim dhe janë në gjendje të mirë shëndetësore. 157 njerëz të dyshuar në total, 12 janë pozitiv. Lidhur me gjendjen e tyre shëndetësore, 3 janë të shtruar në Infektin në gjendje stabël, një në Durrës. 7 janë në vetë izolim, pa shenja klinike. Po vazhdojmë të gjurmojmë rastet”, njofton Ministria e Shëndetësisë.
Që prej ditës së djeshme, bashkitë kanë nisur dezinfektimin e ambjenteve publike.
Qeveria ndërkohë ka marrë një sërë masash për parandalimin e përhapjes së virusit, duke filluar nga pezullimi i shkollave, mbyllja e lokaleve dhe anulimi i aktiviteteve.
Gjithashtu janë ndërprerë edhe fluturimet e lundrimet me Italinë.
Pacienti zero në Shqipëri erdhi nga Firenze nëpërmjet pikës kufitare të Hanit të Hotit.
Ai infektoi babanë dhe tre të afër të tjerë.
Ata ndodhen tashmë në godinën e Infektivit në QSUT.
