Kryetari i Partisë Demokratike, Lulzim Basha e ka vijuar turin e tij, me takimet e strukturave të PD-së edhe në qytetin e Shkodrës. Basha i cilësoi sërish zgjedhjet e 25 prillit si “skenë krimi” dhe akuzoi Partinë Socialiste se i kanë vjedhur votat. Sipas Bashës paratë e korrupsionit janë derdhur lum për të shantazhuar, intimiduar dhe blerë votuesit. Gjithashtu ai ka thënë se Rama-Doshi kanë fshehur koncesionin e Partisë Socialiste si kamuflazh nën siglën e PSD-së.
“Sot nga Shkodra e krenarisë kombëtare më vjen keq të pohoj se jemi në një nga skenat e krimit të 25 prillit. Këtu hileja e regjimit Rama-Doshi fshehu koncesionin e Partisë Socialiste si kamuflazh nën siglën e PSD-së.
Por sikurse e dinë shkodranët dhe e gjithë Shqipëria, nuk ka PSD. Ka një ndërmarrje të përbashkët të Edi Ramës dhe të Tom Doshit. Nuk ka PSD, sepse ka tre kandidate të dalë nga masakra zgjedhore e 25 prillit, që të tre drejtorë të Partisë Socialiste. Si asnjë herë tjetër, shteti u përvesh me të gjitha mjetet në aleancë me krimin kundër opozitës, kundër Partisë Demokratike për të tjetërsuar vullnetin e shqiptarëve. Të gjithë jemi dëshmitar se si i derdhën lumë paratë e korrupsionit dhe i përdoren banditët për të shantazhuar, intimiduar dhe blerë votuesit. Në mënyrën më të paimagjinueshme që nga kohërat më të egra të diktaturës.”, tha kreu i Partisë demokratike, Lulzim Basha.
Lideri i Partisë Demokratike me vargjet e Pasho Vasës, ka vajtuar për gjendjen e mjeruar në të cilën ndodhet vendi pas 25 prillit sipas tij.
“Po sot Shqypni po më thuaj si je”- do të thoshte Pashko Vasa. Si është pra, Shqipëria pas 25 prillit? A është më e mirë Shqipëria pas 25 prillit? A ka Shqipëria një parlament pa krim pas 25 prillit? A është më e bashkuar Shqipëria pas 25 prillit? A ka një të ardhme të qartë europiane Shqipëria dhe shqiptarët pas 25 prillit?”, tha lideri i PD.
Basha ka vazhduar më tej duke thënë se beteja deri në fitore do të vazhdojë.
“Ndaj, sot kam ardhur t’ju thënë për të vazhduar dhe për ta çuar së bashku deri në fitore betejën që kemi nisur. “, deklaroi Basha.
