Detaje të reja janë zbuluar nga SPAK, në lidhje me shkatërrimin e grupit të trafikantëve të lëndëve narkotike, të cilëve krahas arrestimeve dhe lëshimit të urdhër arresteve u janë sekuestruar edhe drogë si edhe pasuri të paluajtshme.
SPAK njoftoi se në kuadër të operacionit “Shpirti” që po zhvillohet në 4 shtete, u arrestuan edhe dy ish-shoqëruesit e ministrit Saimir Tahiri. Mësohet se dy të arrestuarit, të cilët ishin shoqërues të ministrit të Brendshëm Saimir Tahiri në kohën kur kryen veprën penale, janë Hekuran Marku dhe Agustin Deda. Krahas tyre, SPAK njofoi arrestimin edhe të prokurorit të Vlorës Maksim Sota si edhe të disa zyrtarëve të lartë të policisë
“Në veçanti, masat e sigurisë personale janë ekzekutuar, (përveç 10 shtetasve që janë arrestuar më parë në kuadër të operacionit Kulmi) edhe për një administrator publik (drejtor), nje prokuror, tre zyrtar të larte te policisë e dy punonjës te tjerë policie, këta dy të fundit në kohën e kryerjes së veprave penale – në vitin 2016 – me detyrën e pjestarëve të grupit te shoqerimit të ish – Ministrit të Brendshëm. Zyrtarët publik, në disa raste pronarë të drogës, kanë garantuar, jo vetëm nga ana tokësore, por edhe detare në Shqipëri, që dërgimi i lëndës narkotike i destinuar në brigjet e Puglia-s të kryhej me siguri të plotë”, bën me dije SPAK.
Gjithashtu kujtojmë se mes 38 të arrestuarve janë edhe dy punonjës të policisë, të cilët veprën penale e kanë kryer në vitin 2016, periudhë gjatë të cilës mbanin detyrën e shoqëruesve të ministrit të Brendshëm. Në atë kohë, ministër i Brendshëm ka qenë Saimir Tahiri.
