Ditën e sotme kryetarja e komanduar e Bashkisë së Durrësit Valbona Sako ka shkarkuar nga detyra nënkryetarin Arbër Braho, pasi ky i fundit denoncoi në emisionin Task Force në Syri Tv nga moderatorja Sonila Meço skandalet në bashkinë e dytë më të madhe në vend.
Braho në një intervistë me Skype shprehet se vendimi i është dukur i papritur, duke shtuar se do i drejtohet gjykatës me padi.
“Dje në orën 16:00 më është thënë se jam shkarkuar nga kryetarja e bashkisë e komanduar, Sako. Kryetarja në detyrë e kishte lënë te protokolli, nuk donte as përballje dhe as sqarim. Shkarkimi im nuk ishte programuar.
Unë para dy muajsh isha vlerësuar si punonjës tepër profesional në Bashkinë e Durrësit. Mendoj se do i drejtohem gjykatës me padi. Ka njerëz që mendojnë se prapa meje ka persona që më suportojnë, por të vetmit që më suportojnë janë familja ime dhe buzëqeshjet e njerëzve. Unë jam socialist i orëve të para, që ika ardhur në majë të hundës me situatën aktuale”, u shpreh Braho.
Kujtojmë se një ditë më parë, Braho ka bërë një denoncim publik ndaj ish-kryebashkiakut Vangjush Dako. Në një status të publikuar në WhatsApp, Braho e quan Dakon, “xhuxhi 339”, referuar edhe përgjimeve për vjedhjen e votave dhe e akuzoi atë për vjedhje fondesh publike si në rastin e autoshkallës për të cilën Prokuroria e Posaçme Kundër Korrupsionit dhe Krimit të Organizuar organizoi një operacion dhe vuri në pranga zyrtarë.
