Komisioni i Pavarur i Kualifikimit, ditën e sotme vendosi shkarkimin e Ilir Mustafajt. Ky i fundit është gjyqtar në Gjykatën e Tiranës dhe njëherësh është kandidat për në Gjykatën Kushtetuese.
Një nga pikat ku u vendos diskutimi dhe përjashtimi i tij ishte pasuria. Kjo ka sjellë edhe përjashtimin e Mustafajt nga të qenit pjesë në sistemin e drejtësisë. Ai ka edhe mundësinë për të apeluar këtë vendim në KPA.
Ilir Mustafaj ka përfunduar fakultetin e Drejtësisë në vitin 1996 dhe ka punuar deri në vitin 2000 si ndihmësgjyqtar në Gjykatën e Tiranës.
Ai ushtron funksionin e gjyqtarit në Gjykatën e Tiranës prej vitit 2000, ndërkohë që ka qenë edhe anëtar Këshillit të Lartë të Drejtësisë.
Krahas punës si gjyqtar, Mustafaj ka punuar edhe si pedagog i jashtëm në fakultetin e Drejtësisë në Tiranë si dhe në disa universitete private në vend.
Hetimi për pasurinë ka qenë në disa pikëpyetje në lidhje me pronat e Mustafajt.
Lidhur me një apartament 121 metra katror në Tiranë, ai kishte deklaruar si burim një kredi të marrë në vitin 2006, kjo për vlerën e 40 mijë eurove, por edhe 7 mijë euro që i kishte marrë nga disa persona të tretë.
“Në deklaratën veting deklarohet apartament banimi me sipërfaqe 121 m2 ndodhur në rrugën Siri Kodra mbi bazën e kontratës së vitit 2007. Ndërsa në deklarimin e vitit 2007 nuk deklarohet fitimi i pronësisë për apartamentin në fjalë si dhe nuk deklarohet kontrata e shitblerjes”, është shprehur relatorja Xhensila Pine.
Ajo shtoi se është gjetur mospërputhje edhe për çmimin e paguar për këtë apartament, pasi në deklaratën veting deklarohet e blerë për 46 mijë euro për shkak të sipërfaqes më të vogël dhe disa punimeve të pakryera. Ndërsa në vitin 2007 çmimi ishte 54.6 mijë euro.
Këto e disa probleme të tjera janë konstatuar në deklarimin e tij, ku Mustafaj i ka kundërshtuar, por nuk ka pasur asnjë efekt, pasi dosja e tij hetohej prej disa muajsh.
