Pas marrjes së vendimit për shkarkimin e Drejtorit të Policisë së Tiranës nga detyra, ka reaguar edhe Ministri i Brendshëm, Sandër Lleshaj.
Përmes një postimi në rrjetin e tij social, Twitter, Lleshaj ka thënë se vendimi i largimit të kreut të policisë pas veprimeve të ndodhura ditën e sotme pranë shkollës “Petro Nini Luarasi” ishte një vendim i drejtë.
Sipas tij, policia nuk duhet të mjaftohet vetëm duke qenë ligjërisht në rregull, por edhe të jetë me mendje dhe zemër në lartësinë që e kërkon interesi publik.
Reagimi i Sandër Lleshaj në Twitter:
Vendimi i kreut të Policisë së Shtetit për lirimin nga detyra të drejtuesit të Policisë së Tiranës është reagimi i duhur. Nuk mjafton që Policia të jetë ligjërisht në rregull. Prej saj kërkohet më shumë. Ajo duhet të jetë dhe me mendje e zemër në lartësinë që e kërkon ndjeshmëria dhe interesi i publikut. Jo si sot, tek rruga e shkollës “Petro Nini”!
Vendimi për shkarkimin e Drejtorit të Policisë së Tiranës, Kastriot Skënderaj është marrë ditën e sotme pas një mbledhje të organizuar pas rrëmujës së krijuar pranë shkollës “Petro Nini Luarasi” edhe pse shkarkimi i tij ka disa ditë që përflitet.
