Pas vetëm katër muajsh në detyrë, Ilir Ajdini është shkarkuar nga pozita e drejtorit të Autoritetit Kombëtar të Veterinarisë dhe Mbrojtjes së Bimëve, nga Ministrja e Bujqësisë dhe Zhvillimit Rural, Anila Denaj.
Ky vendim ka ardhur si pasojë e një situate të rënduar në shërbimin veterinar shtetëror, si dhe akuzave për shkelje të ligjit në procesin e emërimit të tij.
Burime pranë Ministrisë thonë se shkarkimi lidhet me shkeljet ligjore të bëra gjatë emërimit të Ajdinit, një çështje që ishte denoncuar nga Presidenti i Urdhrit të Mjekut Veterinar të Shqipërisë, Ervin Resuli.
Ai kishte ngritur shqetësimin për shkeljen e VKM-së Nr. 683, që përcaktonte qartë kriteret për emërimin e drejtorëve të AKVMB-së, duke kërkuar një profesionist të kualifikuar në fushën veterinare. Ky shqetësim ishte pranuar edhe nga Ministrja Denaj.
Përtej shkeljeve ligjore, periudha katërmujore e Ajdinit në krye të AKVMB-së ka shënuar dështime të shumta, mes të cilave:
• Dështimi i programit të vaksinimit të brucelozës, i cili rrezikoi shëndetin e bagëtive dhe sigurinë ushqimore.
• Kontrabanda e lopëve me brucelozë nga Greqia, duke ngritur shqetësime për shëndetin e kafshëve.
• Përhapja e gripit të shpendëve, që ka shkaktuar humbje të konsiderueshme për fermerët.
• Afera e mandarinave, ku punonjës të AKVMB-së u arrestuan për lëshimin e certifikatave fitosanitare të falsifikuara.
Këto ngjarje sollën një krizë të thellë në shërbimin veterinar, duke u diskutuar gjerësisht në Kongresin e Parë Ndërkombëtar të Mjekësisë Veterinare Shqiptare, i mbajtur në Durrës.
Veterinerët shqiptarë kërkuan që drejtimi i AKVMB-së t’i besohet një profesionisti të fushës dhe jo një individi pa formim në këtë sektor.
UPMVSH ka propozuar Dr. Sulejman Kullollin, drejtorin aktual të Drejtorisë Rajonale të Veterinarisë dhe Mbrojtjes së Bimëve në Tiranë, si kandidat kryesor për postin e drejtorit të AKVMB-së. Dr. Kullolli ka një karrierë të gjatë dhe përvojë të gjerë në fushën veterinare, dhe shihet si një opsion i natyrshëm për të rikthyer profesionalizmin dhe besimin në këtë institucion.
Shkarkimi i Ajdinit është parë si një fitore për komunitetin veterinar shqiptar, që kërkon një reformë të thellë dhe një drejtim profesional të AKVMB-së.
Tashmë, pritet vendimi i Kryeministrit për emërimin e drejtuesit të ri, me shpresën se shërbimi veterinar do të drejtohet nga një profesionist, për të garantuar shëndetin e kafshëve dhe sigurinë ushqimore në vend.
