Edi Rama doli të na shpjegojë përmbytjet me shishe plastike dhe qytetarë “zhulsa”. Një kryeministër që heq çdo faj nga vetja dhe sillet sikur bashkitë nuk janë nën kontrollin e tij, sikur vendimet nuk mbajnë firmën e tij, sikur paratë publike avullojnë vetë. Ironi e hidhur: zhuli i madh i këtij sistemi shpall zhulsa qytetarët e tij.
Durrësi nuk u përmbyt nga shiu. U përmbyt nga qeverisja. Nga bashki që ulën investimet dhe rritën pagat e veta. Nga buxhete që rriten në të ardhura dhe tkurren në vepra. Në 2024, investimet ranë, ekzekutimi i buxhetit ra, ndërsa shpenzimet administrative u frynë. Më pak infrastrukturë, më shumë propagandë.
Dhe propaganda ka një çmim. Porto Romano, Kënetë, hidrovori “zgjidhje finale”. Bashkia e llogarit projektin rreth 12 milionë euro. Qeveria e Ramës e çon në rreth 20 milionë euro. Tetë milionë euro shtesë me një firmë. Pastaj tender “emergjence”, garë e cunguar, fitues me 99.9 për qind të fondit limit. Në terren, qyteti mbytet. Në letër, gjithçka shkëlqen.
Rama flet për plehra, por harron inceneratorët që duhej t’i digjnin, për të cilat edhe Lali po vuan dënimin në burg. U ndërtuan në letra, u paguan me miliarda, nuk funksionuan kurrë. Paratë u vodhën, plehrat mbetën. Sot i përdor si alibi. Nesër na quan sërish zhulsa.
Flet sikur nuk i ka bashkitë nën komandë. Sikur nuk i ka vendimet në dorë. Sikur nuk e ka fryrë ai faturën. Sikur nuk e di kush i merr tenderët. Sikur nuk e di kush përfiton. Emrat dihen, lidhjet dihen, modeli dihet. Me Kastratin, interesi privat u bë ligj, ndërsa interesi publik u përmbyt.
Ndërkohë, nga BE vijnë dhjetëra miliona euro grante për kanalizime dhe ujëra të ndotura. Para ka. Zgjidhje në terren jo. Sepse problemi nuk është mungesa e fondeve, por korrupsioni, projektimi i rremë, mbikëqyrja fiktive dhe një shtet që preferon fotot me çizme si Pirro Vëngu, sesa punën pa kamera.
Përmbytjet nuk janë fatkeqësi natyrore. Janë provë penale. Dhe sa herë që uji ngrihet, nxjerr në sipërfaqe jo shishe e plehra, por firmat, faturat dhe gënjeshtrat e kësaj qeverie. Shiu kalon. Llogaria mbetet.
