Instituti Kombëtar i Shëndetësisë Publike (IKSHP), në Kosovë, ka deklaruar se gjatë ditës së sotme, janë regjistruar edhe katër viktima nga koronavirusi. Viktimat mësohet se janë nga Dragashi, Gjilani, Mitrovica dhe Suhareka.
Sipas njoftimit ditor për situatën epidemiologjike, janë testuar edhe 1.751 mostra, prej të cilave janë konfirmuar 279 raste pozitive.
Janë shëruar po ashtu në 24 orët e fundit nga koronavirusi, edhe 431 pacientë, ndërsa raste aktive janë 5.795.
Kujtojmë se që prej fillimit të pandemisë, në 13 marsit 2020, kur janë regjistruar rastet e para me koronavirus në Kosovë, autoritetet shëndetësore kanë raportuar për 54.261 të prekur nga sëmundja covid-19. Prej tyre 1.387 pacientë kanë vdekur ndërsa 47.079 janë shëruar.
Kryeministri në detyrë i Kosovës, Avdullah Hoti, ka deklaruar se për shkak të rritjes në mënyrë të shpejtë të rasteve të reja edhe nga risku i përhapjes së variantit të ri të koronavirusit, ka vendosur së bashku me komitetin e ekspertëve, ministrin e Shëndetësisë, Armend Zemaj si dhe drejtorin e Institutit Kombëtar i Shëndetësisë Publike në Kosovë (IKSHPK), Naser Ramadani, që të shtojnë vigjilincën si dhe të ndërmarrin masa të reja për parandalimin dhe mosdaljes nga kontrolli të pandemisë në vend.
Kryeministri Hoti ndër të tjera ka deklaruar edhe më parë se Kosova është në limitet e kapaciteteve të saj për përballimin e pandemisë ndërsa theksoi se masat e reja janë të ndara në dy grupe, në ato që përfshijë gjithë territorin e Kosovës dhe masa të cilat vlejnë për komuna të kategorizuara në tre grupe sipas nivelit të rrezikshmërisë./Gazetareforma.com/
