Ka shkuar në 154 numri i të shëruarve nga COVID-19 në vendin tonë.
Në një postim në rrjetet sociale, kryeministri Edi Rama bën me dije, se brenda 24 orëve janë shëruar 23 pacientë.
Duhet theksuar se ky është numri më i madh i të shëruarve brenda 24 orëve.
Ditën e djeshme u shënua edhe një rënie drastike e numrit të rasteve të reja, pasi u regjistruan vetëm 6.
Kështu që bilanci i COVID-19 shkoi në 383 të prekur, në mesin e të cilëve 22 viktima dhe tashmë 154 të shëruar.
Në total që nga fillimi i epidemisë janë kryer 2753 teste, nga të cilët 383 kanë rezultuar pozitivë.
Në spitalin Infektiv aktualisht ndodhen 6 të shtruar ku 5 prej tyre janë në terapi intensive.
Ndërsa në spitalin COVID2, ndodhen 7 pacientë, 6 prej të cilëve në terapi intensive, ku 3 janë intubuar.
Pavarësisht uljes së numrit të rasteve të reja, Ministria e Shëndetësisë i bën thirrje qytetarëve, që të vijojnë me zbatimin e higjienës, distancimit social dhe kufizimit të daljeve nga shtëpitë.
