Më shumë se 400 emigrantë kanë vdekur në detin Mesdhe në fillim të vitit 2023, duke tentuar ta kalojnë Mesdheun Qendror nga Afrika Veriore për në Europës. Sipas një deklarate të Kombeve të Bashkuara, ky është tremujori i parë me më së shumti raste të vdekjeve në gjashtë vjet.
Organizata Ndërkombëtare për Emigracion ka regjistruar 441 vdekje në muajt janar-mars, për rrugën më vdekjeprurëse të emigrimit në botë, ku është theksuar se numri i vdekjeve mundet të jetë më i madh sesa është dokumentuar. Sipas raportit, rreth gjysma e këtyre viktimave lidheshin me operacionet e ngadalta të shpëtimit të udhëhequra nga shtetet ose nuk kishte fare mision shpëtimi.
Sipas António Vitorino, drejtor i përgjithshëm i Organizatës Ndërkombëtare për Emigracion, është e patolerueshme që krizat humanitare në Mesdheun Qendror të vazhdojnë.
“Unë shqetësohem për faktin se këto tragjedi janë bërë të zakonshme, pasi që nga vitit 2014 më shumë se 20.000 viktima janë raportuar në këtë rrugë. Shtetet duhet të veprojnë”, tha ai.
Në kërkim të një jete më të mirë në Europë, mijëra emigrantë, kryesisht nga Afrika, nisen kryesisht me varka të vogla në udhëtime të rrezikshme nga brigjet e Libisë dhe Egjiptit.
Krahasuar me rrugën nga Maroku për në Spanjë, kjo rrugë përmes Mesdheut Qendror është më ndryshe. Shumë shpesh anijet fundosen, si në rastin e një anijeje në rajonin jugor italian të Kalabrisë, që la të vdekur të paktën 72 migrantë në fund të shkurtit. Pas një “rritjeje të madhe” të fluksit të emigrantëve nëpër Mesdhe, Qeveria e Italisë shpalli të martën gjendjen e jashtëzakonshme për emigracionin. Kjo është bërë për të menaxhuar më mirë fluksin e emigrantëve dhe për të lehtësuar procedurat për riatdhesim./ REL
