Policia e Tiranës ka finalizuar me sukses operacionin e koduar “Foreigners”, duke arrestuar dy shtetas turq, një burrë 31-vjeçar dhe një grua 27-vjeçare, të dyshuar për shfrytëzim prostitucioni.
Hetimet zbuluan se të arrestuarit kishin rekrutuar dhe detyruar dy gra, njëra nga Turqia dhe tjetra nga Azerbajxhani, të ushtronin prostitucion në një apartament në Rrugën e Barrikadave.
Sipas informacionit të siguruar nga policia dhe veprimeve hetimore të kryera nën drejtimin e Prokurorisë së Tiranës, u arrit të dokumentohej aktiviteti i paligjshëm i dy të arrestuarve:
• M. H., 27 vjeçe, dhe S. B., 31 vjeç, të dy banues në Tiranë, u ndaluan për veprën penale “Shfrytëzimi i prostitucionit”, kryer në bashkëpunim.
• Dy gratë që ushtronin prostitucion u proceduan penalisht në gjendje të lirë.
Gjatë operacionit, policia sekuestroi:
• 2500 euro dhe 200 dollarë, të dyshuara si të ardhura nga kjo veprimtari e paligjshme.
• 3 celularë, të cilët do të analizohen për të zbuluar detaje të mëtejshme mbi rrjetin e shfrytëzimit.
Materialet procedurale janë dorëzuar në Prokurorinë e Tiranës, e cila do të vijojë hetimet për të zbardhur të gjitha rrethanat e kësaj çështjeje.
