Është konfirmuar rasti i parë me linë e majmunit në Shqipëri. Një 30-vjeçar rezulton i infektuar me virusin monkeypox, një sëmundje virale infektive që deri më tani nuk ishte identifikuar në vendin tonë.
Sipas të dhënave paraprake, i riu kishte udhëtuar në zona ku virusi qarkullon, gjë që mjekët e kanë konsideruar si burimin më të mundshëm të infektimit. Deri në këtë moment, Instituti i Shëndetit Publik nuk ka raportuar raste të tjera të konfirmuara në vend.
Lija e majmunit (e njohur gjithashtu si mpox) shfaqet me temperaturë, dhimbje trupi, ënjtje të nyjave limfatike, si dhe skuqje që më pas kthehen në puçrra me kore. Këto shenja zakonisht shfaqen në fytyrë, duar dhe organe gjenitale.
Sëmundja transmetohet përmes kontaktit të drejtpërdrejtë me lëkurën e një personi të infektuar, marrëdhënieve intime, apo përmes objekteve të ndotura si çarçafë, rroba dhe peshqirë.
Origjina e virusit lidhet me kafshët e egra në Afrikë, por në vitin 2022 sëmundja u përhap në Evropë, SHBA dhe Mbretërinë e Bashkuar. Spanja rezulton të jetë vendi më i prekur në Evropë me rreth 8,100 raste, e ndjekur nga Franca dhe Britania.
Edhe pse monkeypox është sëmundje e kurueshme, pacientët këshillohen të izolohen për të shmangur përhapjen tek persona të tjerë. Formën më të rëndë të simptomave e shfaqin kryesisht fëmijët dhe personat me imunitet të dobësuar.
