Godina ku janë vendosur zyrat e partisë Fryma e Re Demokratike u bë sot “molla e sherrit”, pasi Policia Bashkiake shkoi me një urdhër për lirimin e hapësirave të tyre. Erion Veliaj deklaroi më herët se godina është në pronësi të Bashkisë, ndërsa tashmë janë publikuar edhe dokumentat.
Në shkresat e publikuara duket se ndërtesa në fjalë i ka kaluar në pronësi BASHKISË SË Tiranës në 28.8.2013 me anë të një VKM-je të miratuar nga vetë ish kryeministri Sali Berisha, deklaron Bashkia e Tiranes.
“Godina në të cilën Fryma e Re Demokratike ka selinë e saj është në pronësi të Bashkisë së Tiranës. Ajo i ka kaluar në pronësi të bashkisë në vitin 28.8.2013 me anë të një VKM-je të miratuar nga vetë ish kryeministri Sali Berisha.
Që prej atij viti ndërtesa, që është në pronësi të Bashkisë së Tiranës, përdoret nga kjo e fundit për të ofruar një sërë shërbimesh ndaj qytetarëve. Në këtë godinë, ndodhen zyrat e Agjencisë së Mbrojtjes së Konsumatorit (AMK), disa sektorë të burimeve njerëzore, si dhe disa zyra të drejtorisë juridike.
Në katin e tretë të saj ishin dhe zyrat e FRD-së, e cila duhet t’i lirojë ato për shkak se kjo parti nuk ka më përfaqësim në Parlament. Ligji për partitë politike përcakton qartë se bashkitë duhet t’u sigurojnë seli vetëm partive politike që kanë deputetë në Kuvendin e Shqipërisë. Në këtë rast, FRD-ja nuk e plotëson këtë kusht, prandaj duhet të lirojë zyrat në katin e tretë të godinës,” thotë Bashkia e Tiranës.
Ditën e sotmë Policia Bashkiake bastisi zyrat e FRD dhe nuk munguan edhe momentet e tensionuara dhe përplasjet fizike ku u përfshi edhe presidenti Ilir Meta. Në mbështetje të FRD shkoi më vonë edhe kreu demokrat, Lulzim Basha.
