Gazetari Spartak Koka ka komentuar ngjarjet e rënda kriminale që kanë ndodhur ditët e fundit në Tiranë, duke theksuar se ato janë pasojë e mosveprimit të institucioneve përgjegjëse.
Koka u shpreh se si vrasja e 14-vjeçarit Martin Cani, i cili u qëllua me thikë pranë shkollës, ashtu edhe plagosja e 19-vjeçarit, janë pasojë e konflikteve të pasqaruara dhe të papara nga autoritetet.
Ai tregoi se konflikti mes të rinjve kishte vazhduar për disa ditë, por askush nuk e kishte raportuar situatën dhe se ishte injoruar nga të gjithë. Koka tha se konflikti i nisur në mjediset e universitetit privat, që përfshinte shikime dhe fjalë të rënda mes të rinjve, kishte çuar në plagosjen e një 19-vjeçari, i cili tani është në gjendje të rëndë për jetën. Ai theksoi se ky person ka pësuar goditje me thikë në mushkëri, kraharor dhe qafë dhe se gjendja e tij ishte shumë e rënduar.
“Historia te universiteti privat kishte zhvillimin e saj që nga disa ditë më parë, dhe askush nuk thoshte asgjë për këtë situatë. Secili përpiqej të hakmerrej ndaj tjetrit për shikimet, fjalët e rënda dhe një lloj bullizmi që ndodhte brenda shkollës. Tani personi që u plagos është në luftë për jetën, ka plagë të rënda dhe mund të kemi një viktimë tjetër. Uroj që jo, por situata paraqitej mjaft e rënduar dhe kam qenë në kontakt me mjekët mbrëmjen e djeshme,” tha gazetari.
Koka e lidhi këtë ngjarje me neglizhencën dhe mungesën e ndërhyrjes nga autoritetet për të parandaluar përshkallëzimin e konflikteve, të cilat, sipas tij, janë shumë të shpeshta dhe shpesh kalojnë pa u vënë re deri në momentin e fatkeqësive të rënda. Gazetari theksoi se kjo është një situatë alarmante që kërkon reagim urgjent nga institucionet për të parandaluar të tjera tragjedi.
