Një konflikt që nisi jashtë një lokali nate në Seres të Greqisë ka përfunduar tragjikisht, duke lënë pas një viktimë, dy persona të arrestuar dhe dy të tjerë në kërkim.
Viktima, një 34-vjeçar grek, babai i tre fëmijëve, u ndalua të hynte në lokal për shkak se ishte në gjendje të dehur, sipas rojeve të sigurisë.
Roja i lokalit, shtetasi shqiptar Gushalli Hoxha, 27 vjeç, pati një debat verbal me viktimën dhe dy miqtë e tij grekë, të cilët më pas u larguan. Dy orë më vonë, situata degjeneroi kur grupi i grekëve sulmoi fizikisht Hoxhën dhe një mik të tij grek në rrugë.
Gjatë përplasjes, Hoxha përdori një thikë ushtarake duke goditur viktimën katër herë, çka rezultoi fatale për shkak të dëmtimeve të rënda në arteriet kryesore. Një mik grek i Hoxhës qëlloi gjashtë herë në ajër me një armë tip pistoletë gjatë incidentit.
Policia arrestoi Hoxhën dhe mikun e tij grek, ndërsa dy nga personat grekë të përfshirë në sulm janë shpallur në kërkim.
Hetimet janë marrë në dorë nga departamenti i krimeve të Seresit. Dy të arrestuarit do të dërgohen në gjykatë për masë sigurie.
