Zbardhen detaje të reja nga ngjarja e rëndë e ndodhur më 8 maj në qytetin italian të Pratos, ku mbeti i vrarë me thikë 35-vjeçari shqiptar, Vladimir Lleshi.
Dy të rinj shqiptarë, 17 dhe 19 vjeç, janë ndaluar nga autoritetet italiane si autorë të dyshuar të vrasjes.
Sipas burimeve hetimore, konflikti fatal nisi për shkak të një debati në rrjete sociale që kishte lidhje me një vajzë.
Takimi mes palëve u zhvillua në kryqëzimin e rrugëve Corridoni dhe Baracca, ku Lleshi kishte shkuar i shoqëruar nga dy persona të tjerë.
Debati u kthye në përplasje fizike, e cila përfundoi me goditjen fatale të Lleshit me thikë.
Dy të rinjtë u larguan menjëherë nga vendngjarja, ndërsa një tjetër shqiptar, 21 vjeç, i cili ndërhyri për të ndalur konfliktin, mbeti i plagosur dhe u transportua në spital. Ai ndodhet jashtë rrezikut për jetën.
Zëvendësprokurorja Valentina Cosci po ndjek nga afër hetimet, ndërsa autoritetet italiane kanë marrë në dorë pamjet e kamerave të sigurisë dhe dëshmitë për të plotësuar skemën e ngjarjes.
