Një konflikt masiv ka shpërthyer rreth orës 01:35 të datës 2 janar 2025, në fshatin Gjashtë, Sarandë, ku janë përfshirë disa shtetas, përfshirë punonjës policie jashtë shërbimit.
Konflikti dyshohet se ka lindur për motive të dobëta dhe ka përfshirë përdorimin e sendeve të forta dhe armëve të zjarrit, pasi janë gjetur gëzhoja dhe shenja plumbash në automjete.
Në mesin e të përfshirëve janë vëllezërit Sulejmani, punonjës policie, dhe vëllezërit Enea dhe Albi Nexhipi.
Si pasojë e konfliktit, Enea dhe Albi Nexhipi janë plagosur lehtë dhe janë dërguar për ndihmë mjekësore, ndërsa më pas janë shoqëruar në Komisariatin e Policisë Sarandë për veprime të mëtejshme.
Gjatë ngjarjes janë përfshirë edhe katër efektivë të policisë, të gjithë nga fisi Sulejmani, të cilët punojnë në Komisariatin e Policisë Kufitare Sarandë dhe në Komisariatin e Himarës.
Në vendngjarje ka pasur shenja të përdorimit të armëve, dhe dyshohet se janë përfshirë më shumë se 10 persona në këtë konflikt. Grupi hetimor dhe AMP, nën drejtimin e Prokurorisë Sarandë, po punojnë për zbardhjen e ngjarjes dhe identifikimin e të gjithë të dyshuarve.
Nga hetimet paraprake është zbuluar se konflikti ka pasur lidhje me një borxh, dhe mes të përfshirëve janë: Alvaro Sulejmani (efektiv në Policinë Himarë), Kidi Sulejmani (efektiv në Policinë Kufitare Sarandë), Redi Sulejmani (student në Akademinë e Policisë), Ergis Sulejmani (efektiv në Policinë Kufitare Sarandë), Igli Duka (ish-efektiv i Policisë Sarandë), Beqir Cocka dhe Mihal Sulejmani. Alvaro Sulejmani, Beqir Cocka dhe Mihal Sulejmani janë dorëzuar në komisariat.
Po vazhdojnë hetimet për të shoqëruar të gjithë personat e përfshirë dhe për të sqaruar plotësisht ngjarjen.
