Çrregullimet e spektrit të autizmit janë ndër shqetësimet më të zakonshme neurozhvillimore dhe shpesh përbëjnë një frikë të madhe për prindërit.
Por cilat janë sinjalet e para që mund të tregojnë nevojën për vlerësim nga një mjek specialist?
Disa nga shenjat më të hershme përfshijnë:
• Vonesë në zhvillimin e të folurit;
• Mungesë reagimi ndaj emrit të tij;
• Humbje e aftësive gjuhësore apo sociale të fituara më herët;
• Mungesë kontakti vizual;
• Mungesë e buzëqeshjes apo përgjigjeve sociale;
• Vështirësi në krijimin e miqësive;
• Vështirësi për të nisur apo mbajtur një bisedë me bashkëmoshatarët;
• Mungesë e lojës imagjinare apo asaj në grup;
• Përdorim i çuditshëm apo i përsëritur i gjuhës;
• Interesa të ngushta dhe të pazakonta;
• Fiksim ndaj objekteve të veçanta;
• Refuzim për të pranuar ndryshime në rutinë;
• Reagime të ekzagjeruara ose të dobëta ndaj zhurmave, dritës apo prekjes;
• Lëvizje të përsëritura dhe pa qëllim të dukshëm.
Simptomat mund të jenë shumë të ndryshme nga një fëmijë tek tjetri, si në formë ashtu edhe në intensitet.
Sa më herët të vërehen këto shenja dhe të kërkohet ndihmë profesionale, aq më të mëdha janë mundësitë për ndërhyrje të suksesshme dhe mbështetje të duhur në zhvillimin e fëmijës.
