Të paktën 98 persona kanë humbur jetën dhe mbi 150 të tjerë janë plagosur pas shembjes së çatisë së një klubi nate në Santo Domingo, kryeqyteti i Republikës Domenikane.
Ngjarja tragjike ndodhi në orët e para të mëngjesit të së martës, gjatë një koncerti të këngëtarit të njohur të merengues, Rubby Pérez, në ambientet e klubit Jet Set.
Në momentin e incidentit, në lokal ndodheshin rreth 300 persona. Çatia u rrëzua papritur rreth orës 1 të mëngjesit, ndërsa autoritetet ende nuk kanë dhënë një shkak zyrtar për shembjen.
Në vendngjarje janë angazhuar mbi 400 punonjës emergjence, të cilët vijojnë kërkimet mes rrënojave për të gjetur të mbijetuar.
Mes viktimave janë edhe emra të njohur, si ish-lojtarët e bejsbollit Octavio Dotel dhe Tony Blanco. Mësohet se Dotel, 51 vjeç, ndërroi jetë gjatë transportit për në spital. Po ashtu, në këtë fatkeqësi humbi jetën edhe guvernatorja e provincës Monte Cristi, Nelsy Cruz, e cila ishte motra e ish-lojtarit të bejsbollit Nelson Cruz.
Familjarë të të zhdukurve janë mbledhur pranë vendngjarjes, duke shpërndarë fotografi dhe duke kërkuar informacion për të afërmit e tyre, ndërsa ambulancat transportojnë të plagosurit drejt spitaleve të zonës.
Presidenti i Republikës Domenikane, Luis Abinader, ka shpallur tri ditë zie kombëtare dhe, bashkë me Zonjën e Parë, ka vizituar vendin e ngjarjes për të shprehur solidaritetin me të prekurit.
Kjo ngjarje rikthen në kujtesë tragjedinë e zjarrit në diskotekën “Puls” në Koçan, duke e çuar numrin e viktimave në 61.
Tragjedia ka lënë një plagë të thellë në zemrat e familjarëve dhe në mbarë komunitetin lokal.
