Kandidati për kryetar i Partisë Demokratike, Agron Shehaj, ka ndarë një tjetër mesazh për demokratë, teksa kanë mbetur vetëm pak ditë nga zgjedhjet e 13 qershorit. Në një postim në rrjetet e tij sociale, Shehaj kërkon votën e tyre, si dhe thekson se demokratët duhet të mendojnë për opozitën që Partia Demokratike duhet të bëjë ndaj regjimit të Edi Ramës.
Sipas Agron Shehajt, zgjedhja e demokratëve më 13 qershor ka dy rrugë, ose do të rrezikojnë të humbasin prapë, ose do të ndryshojnë partinë për të fituar. “Ne demokratët duhet të mendojmë për opozitën që PD duhet të bëjë ndaj regjimit të Edi Ramës.
Ne demokratët duhet të mendojmë për zgjedhjet lokale të vitit 2023 dhe zgjedhjet parlamentare të vitit 2025. A mundet që me Bashën në krye të bëhet opozitë e fortë? A mundet që me Bashën mund të fitohen ndonjëherë zgjedhje?
Zgjedhja para demokratëve më 13 qershor është e thjeshtë: do të rrezikojnë të humbin prapë apo do të ndryshojnë partinë për të fituar. Unë ju bëj thirrje të votoni ndryshimin që PD të bëhet prapë. Partia Që Fiton”, shkroi Shehaj. Në garë për kreun e PD-së, janë katër kandidatë. Lulzim Basha, Fatbardh Kadilli, Agron Shehaj dhe Edit Hardhi do të garojnë me datë 13 qershor.
