Eugena Tomini, shefja e Epidemiologjisë në ISHP ka thënë mbrëmjen e sotme në emisionin “Real Story”, se gjendja e pacientëve të shtruar, të intubuar, në Spitalin Infektiv është e rëndë dhe se vendi ynë ka kapacitete për një situatë të tillë pa qenë nevoja për rimbyllje.
Tomini u shpreh se transmetimi i virusit është në të njëjtat nivele kurse agresiviteti është më i lartë.
“Gjendja e të shtruarve është e rëndë, ata që janë në intubim janë të gjithë në gjendje të rëndë. E theksoj që transmetimi është në të njëjtat nivele. Agresivitieti është më i madh. Virusi i përshtatet ambientit, gjen terren për tu fuqizuar. Sa më shumë persona të jenë të infektuar në një ambient të caktuar aq më e lartë është virulenca”, tha Eugena Tomini, shefja e Epidemiologjisë në ISHP.
Shefja e ISHP-s u pyet gjithashtu nëse po diskutohet rimbyllja nga koronavirusi, dhe kjo e fundit tha se vendi ynë ka kapacitete të përballojë situatën.Gjithashtu Tomini u shpreh se qytetarët duhet të mos neglizhojnë masat ndaj koronavirusit.
Përfaqësuesja e ISHP Eugena Tomini:
“Një vend nuk duhet të gëzojë nëse ka vdekje më pak apo më shumë. Shqipëria renditet ndër të fundit nivele të vdekjes. Shqipëria ka kapacitete për të përballuar gjendjen. E kemi më të mirë që të përballojmë situatën sesa të kthejmë sërish mbylljen. Duhet të respektohen masat në mënyrë korrekte.”
