Shtetet e Bashkuara dhe Kina kanë rënë dakord të zgjasin armëpushimin tregtar deri më 10 nëntor, duke shmangur për momentin një përshkallëzim të ri të konfliktit tarifor mes dy ekonomive më të mëdha në botë.
Vendimi u mor vetëm disa orë përpara se të hynin në fuqi rritjet e reja të ndërsjella të taksave doganore.
Sipas një deklarate të përbashkët nga Pekini dhe Uashingtoni, tarifat e planifikuara do të pezullohen për 90 ditë të tjera. Ky zhvillim vjen pas raundeve të fundit të bisedimeve, të cilat të dyja palët i kanë vlerësuar si “konstruktive”.
Kryenegociatori i Kinës kishte theksuar se synimi ishte ruajtja e armëpushimit, ndërsa zyrtarët amerikanë prisnin konfirmimin final nga presidenti Donald Trump.
Më 11 gusht, Trump firmosi urdhrin ekzekutiv për zgjatjen e pauzës tarifore, vetëm pak orë para skadimit të afatit. Ky vendim parandaloi vendosjen e taksave amerikane deri në 145% për mallrat kineze dhe tarifave kineze deri në 125% për produktet amerikane, masa që do të përbënin një bllokadë pothuajse të plotë tregtare.
Pak para firmosjes, Trump kishte bërë thirrje Pekinit të katërfishonte blerjet e sojës amerikane, duke theksuar se marrëdhëniet e tij me presidentin kinez Xi Jinping janë “shumë të mira”.
Aktualisht, mallrat kineze i nënshtrohen një tarife totale prej 30% në SHBA, e cila përfshin një normë bazë 10% dhe 20% shtesë të vendosur më herët këtë vit për shkak të çështjes së fentanolit. Kina, nga ana e saj, ka ulur normën e tarifave ndaj produkteve amerikane në 10%.
Dy vendet kishin rënë dakord për pezullimin e masave pas bisedimeve të majit në Gjenevë, duke vendosur një pauzë 90-ditore për negociata. Një takim tjetër u zhvillua në fund të korrikut në Suedi, por pa një marrëveshje konkrete.
Sekretari amerikan i Thesarit, Scott Bessent, shprehu optimizëm për ecurinë e procesit, duke theksuar se ende ka hapësirë për një marrëveshje përfundimtare.
