Shtetet e Bashkuara janë të gatshme të rrisin stafin diplomatik në ambasadën e tyre në Moskë për të lehtësuar dhe përshpejtuar procesin e lëshimit të vizave.
Konsultimet mes Rusisë dhe SHBA-ve për normalizimin e funksionimit të ambasadave do të vazhdojnë me raundin e dytë, që do të mbahet sot në Stamboll.
Delegacionin rus do ta udhëheqë ambasadori i Federatës Ruse në SHBA, Alexander Darchiev, ndërsa palën amerikane do ta përfaqësojë zëvendësndihmës sekretarja e shtetit për çështjet e Rusisë dhe Evropës Qendrore, Sonata Coulter.
Takimi i parë i zhvilluar më 27 shkurt zgjati më shumë se gjashtë orë dhe u mbajt në një format me dyer të mbyllura. Maria Zakharova, zëdhënësja e Ministrisë së Jashtme ruse, theksoi se në këtë raund të ri konsultimesh do të marrin pjesë përfaqësues të lartë të ministrive të jashtme të të dy vendeve.
Bisedimet do të përqendrohen në përpjekjet për të kapërcyer pengesat, përfshirë ato teknike, që po e vështirësojnë punën e diplomatëve.
Darchiev, që deri në shkurt udhëhoqi Departamentin për Amerikën e Veriut në Ministrinë e Jashtme ruse, tani do të marrë pjesë si ambasador në SHBA.
Takimi i dytë, ndryshe nga i pari që u mbajt në rezidencën e konsullit të përgjithshëm amerikan në Stamboll, do të zhvillohet në konsullatën e përgjithshme ruse në të njëjtin qytet.
Ambasadori Darchiev ka shprehur gatishmërinë e Rusisë për të zhvilluar një dialog të thelluar me SHBA-në, duke përfshirë çështjen e kthimit të pronave diplomatike të konfiskuara nga Uashingtoni.
Axhenda e bisedimeve do të përfshijë gjithashtu çështje të tjera, si lëvizja e diplomatëve, kufizimet e vizave dhe ato financiare.
Darchiev theksoi se këto diskutime janë të nevojshme për të zgjidhur trashëgiminë e problemeve të lëna nga administrata e mëparshme amerikane, e cila kishte vendosur kufizime të shumta për misionet diplomatike ruse në SHBA.
Po ashtu, delegacioni rus mund të hapë temën e rifillimit të linjave ajrore direkte mes dy vendeve, për të përmirësuar lidhjet institucionale dhe ekonomike.
Zëdhënësja e Departamentit Amerikan të Shtetit, Tammy Bruce, theksoi se qëllimi kryesor i këtyre bisedimeve është përparimi në stabilizimin e funksionimit të misioneve diplomatike të dy vendeve.
