Serbët e zhvendosur nga Kosova kanë paralajmëruar bllokimin e rrugës dhe kalimit të automjeteve të shqiptarëve që vijnë nga vendkalimi Merdar drejt Kurshumlisë, Nishit e Beogradit në drejtim të Suboticës.
Shoqata e serbëve të zhvendosur nga Kosova përmes një njoftimi publik shkruan se çdo të hënë, për tri orë do të ketë bllokim të rrugëve, ndërsa theksuan se shumë afër mund të ndodhë një konflikt i paparashikueshëm mes dy vendeve.
Mediat serbe shkruajnë se sot serbët do bllokojnë rrugët për veturat me shoferë shqiptarë që duan të udhëtojnë për në Serbi.
Kjo lëvizje nga ana serbe vjen si shenjë kundërshtimi të “terrorit” që qeveria e Kurtit po u bën serbëve, të paktën kështu argumentojnë mediat serbe.
“Bllokimi i rrugës do të jetë çdo të hënë për tri orë derisa të ndalet terrori i përditshëm ndaj popullit tonë në Kosovë e Metohi. Terrori që po përjeton populli serb dhe populli tjetër joshqiptar është bërë i padurueshëm dhe është shumë afër një konflikti me pasoja të paparashikueshme”, thuhet në njoftim.
Ata i kërkojnë presidentit të Serbisë, Aleksandar Vuçiç, ministrit të Punëve të Jashtme, Ivica Daçiç dhe anëtarëve të tjerë të Qeverisë së Serbisë që “urgjentisht t’u dërgojnë një letër të gjitha organizatave relevante ndërkombëtare, për të ndalur urgjentisht terrorin dhe arrestimin e serbëve të pafajshëm”, duke përmendur Marrëveshjen e Kumanovës dhe Rezolutën 1244.
