Policia ka arrestuar pronarin e dyqanit dhe shitësin për shitjen e cigareve të dyshuara të kontrabanduara dhe fshehjen e të ardhurave.
Po ashtu, është vënë nën hetim vëllai i pronarit, ndërsa janë sekuestruar 324 paketa cigare pa pullë fiskale.
Njoftimi i policisë:
Finalizohet nga Seksioni për Hetimin e Krimeve Ekonomiko-Financiare, operacioni policor i koduar “Cigarette”.
Goditet 1 rast i shitjes së mallrave të dyshuara të kontrabanduara. Sekuestrohen 324 paketa me cigare, pa pullë fiskale.
Vihen në pranga 2 shtetas (pronari dhe shitësi i dyqanit), procedohet penalisht 1 tjetër.
Specialistët e Seksionit për Hetimin e Krimeve Ekonomiko-Financiare, në vijim të punës për parandalimin, evidentimin dhe goditjen e veprimtarive kriminale në fushën e kontrabandës së mallrave, si rezultat i një pune hetimore të kryer bazuar në informacionet e siguruara nëpërmjet inteligjencës informative, organizuan dhe finalizuan operacionin policor të koduar “Cigarette”.
Gjatë operacionit është ushtruar kontroll në dyqanin e shtetasit P. G., ku nga verifikimet rezultoi se shiteshin paketa me cigare të dyshuara të kontrabanduara dhe fshiheshin të ardhurat e përfituara nga veprimtaria në këtë subjekt.
Në vijim të veprimeve për rastin, u arrestuan në flagrancë shtetasit P. G., 46 vjeç(pronari i dyqanit) dhe S. H., 39 vjeç (shitës në dyqan), të dy banues në Tiranë, si dhe nisi procedimi në gjendje të lirë për shtetasin B. G., 42 vjeç, vëllai i 46-vjeçarit.
Materialet procedurale i kaluan Prokurorisë, për veprime të mëtejshme.
