Në kuadër të Operacioni Forca e Ligjit, policia ka bllokuar tre makina të blinduara.
Automjetet janë pronësi të Saimir Taullau, Dashamir Gjikës dhe Durim Bamit.
Ky i fundi është banues në Krujë dhe ka qenë i dënuar më parë për vjedhje me armë.
Mjeti i Gjikës u ndalua në afërsi të Rinasit, ndërsa vetë biznesmeni u mor në pyetje.
Më herët atij i ishte kërkuar deklarimi i pasurisë, pasi ka dyshime se është përfshirë në trafikun e qenieve njerëzore.
Së bashku me të në makinë ndodhej edhe aktorja Nertila Kapaj.
Ndërsa Taullau i ka shpëtuar të paktën dy atentateve me armë.
Vëllai i tij është vrarë nga banda e Aldo Bares, ndërsa vetë dyshohet për një sërë veprash të renda penale në Lushnje.
Njoftimi i plotë:
Në vijim të Operacionit Forca e Ligjit, në zbatim të ligjit special për masat pasurore ndaj individëve të dënuar apo akuzuar për krim të organizuar, Drejtori i Përgjithshëm i Policisë së Shtetit, në bazë të nenit 19 të Aktit Normativ nr. 1, datë 31.01.2020, nxorri urdhrat e sekuestrimit në kushtet e emergjencës për disa automjete të blinduara, të cilat u sekuestruan gjatë operacionit.
Automjetet e sekuestruara janë në pronësi të shtetasve:
S.T., banues në Lushnjë, i dënuar për veprën penale “Prodhimi dhe shitja e narkotikëve”;
D.Gj., banues në Durrës, i dënuar në Itali për trafik të qenieve njerëzore;
D.B., banues në Krujë, i dënuar për veprën penale “Vjedhja me armë”;
Operacioni vijon dhe OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
