Sektori bankar në Shqipëri ka pësuar një tkurrje të lehtë, jo në fitime, por në numrin total të të punësuarve në tre vitet e fundit.
Sipas ekspertëve, kjo ka ardhur si pasojë e procesit të përqendrimit të sektorit bankar, me blerjen e disa bankave të vogla nga më të mëdhatë, ose me largimin e disa të tjerave, duke sjellë një ulje të numrit të të punësuarve.
Të dhënat nga Shoqata Shqiptare e Bankave tregojnë se, në mesin e këtij viti bankat tregtare punësonin 6,367 punonjës, me një rënie prej 4.6%, krahasuar me një vit më parë dhe 7.1% më pak, krahasuar me mesin e vitit 2018.
Punësimi në sektorin bankar arriti nivelin më të lartë në vitin 2017, me pothuajse 7 mijë të punësuar. Por, në këtë moment nisi procesi i shkrirjeve dhe bashkimeve mes bankave tregtare. Në harkun e tre viteve, bankat tregtare kanë shkurtuar gjithsej 575 vende pune.
Nga 16 banka tregtare në vitin 2018, tashmë Shqipëria ka vetëm 12 të tilla të licencuara.
“Veneto Banka” u shkri me “Intesa Sanpaolo”, “NBG Bank” me “Bankën Amerikane të Investimeve”, “Banka Ndërkombëtare Tregtare” me “Union Bank”, ndërsa “Banka e Kreditit të Shqipërisë” vendosi likuidimin vullnetar.
Ky proces përqendrimi solli dublim të pozicioneve administrative, por edhe të degëve në zona të veçanta, çka çoi në mënyrë të paevitueshme shkurtim të vendeve të punës.
Përtej kësaj tendence, numri i përgjithshëm i të punësuarve është ndikuar ndjeshëm edhe nga ndarja e degës së “BKT” në Kosovë nga banka mëmë. Kjo ka bërë që stafi i degës së Kosovës, të mos raportohet më si pjesë e bankës mëmë në Shqipëri.
Për këtë arsye, “BKT” është banka me uljen më të lartë të numrit të punonjësve krahasuar me vitin e kaluar. Veç rastit specifik të “BKT”, banka që ka raportuar shkurtimet më të mëdha të stafit, krahasuar me mesin e vitit të kaluar, është “ABI Bank”, me 13% më pak, por kjo bankë pothuajse e kishte dyfishuar personelin në 2018-n, pasi bleu “NBG”-në.
Punësimet
Banka me rritjen më të lartë të numrit të punonjësve është “Fibank”, me 7% më shumë krahasuar me fundin e 6-mujorit 2019.
“Credins” (+41), “Union Bank” (+24), “Intesa Sanpaolo” (+34), “OTP” (+31) “Raiffeisen” (+15), kanë zgjeruar personelin këtë vit, në krahasim me qershorin e 2019-s.
Ndërkohë, pandemia e Covid-19 nuk duket të ketë dhënë pasoja afatshkurtra në nivelin e punësimit të sektorit bankar. Gjatë tremujorit të dytë, sektori raportoi 14 të punësuar më shumë.
Nëse në vazhdim kriza e Covid-19 do të shkaktojë pasoja serioze për bankat, kjo mund të shtojë presionin për rritjen e eficiencës dhe uljen e shpenzimeve, duke u bërë një faktor që mund të prekë edhe punësimin.
Në afatin e gjatë, punësimi në sektorin bankar pritet të ndikohet nga proceset teknologjike dhe nga automatizimi i shërbimeve, çka mund të sjellë më pak prani fizike me degë dhe agjenci dhe rrjedhimisht më pak punonjës në rrjete.
Megjithatë, kjo do të kompensohet nga zgjerimi i stafit të lidhur me ofrimin e shërbimeve të bazuara te teknologjia.
/Burimi: Monitor.al/ Përshtati: GazetaReforma.com/
