Në Gjykatën e Prishtinës është mbajtur sot seanca gjyqësore ndaj Naim Murselit, i akuzuar për vrasjen e ish-bashkëshortes së tij, Liridona Ademajt. Përballë trupit gjykues, ai përsëriti se nuk e ka pranuar në asnjë moment autorësinë e krimit.
Murseli i drejtoi disa pyetje ekspertit të psikiatrisë forenzike, Shpend Haxhibeqiri, i cili kishte kryer ekzaminimin psikiatrik. “Në media janë publikuar tituj që pretendojnë se raporti thotë se unë kam qenë në gjendje të aftë kur kam kryer vrasjen. A e kam pranuar ndonjëherë veprën që pretendon prokuroria se e kam bërë?”, pyeti Murseli.
Prokurorja e çështjes, Javorka Prelinceviq, ndërhyri duke sqaruar se provat bazohen vetëm te raporti zyrtar dhe jo te interpretimet mediatike. “Pyetjet duhet të lidhen me raportin. Kësisoj pyetjesh nuk janë të lejuara me ligj”, u shpreh ajo.
Eksperti Shpend Haxhibeqiri deklaroi se raporti nuk është shpërndarë asnjëherë publikisht, pasi përmban të dhëna shumë sensitive. Ai theksoi se gjatë procesit, Murseli ka mohuar të ketë kryer veprën penale. “Ne nuk kemi pyetur kurrë nëse ai e ka kryer apo jo vrasjen, pasi kjo është detyrë e prokurorisë. Por është e vërtetë që i pandehuri e ka mohuar”, tha Haxhibeqiri.
Ndërkohë, avokati i familjes së viktimës, Leotrim Syla, e cilësoi pyetjen e Murselit të palejueshme, duke paralajmëruar rrezikun e vetëinkriminimit. “Kjo është në kundërshtim me etikën e ekspertizës dhe nuk duhet të bëhet pjesë e këtij procesi”, u shpreh Syla.
Seanca pritet të vijojë me dëgjimin e dëshmive dhe shqyrtimin e raporteve të tjera që lidhen me ngjarjen.
