Këtë të premte, kancelari gjerman Olaf Scholz zhvilloi një bisedë telefonike me presidentin rus Vladimir Putin për herë të parë pas dy vjetësh.
Gjatë këtij komunikimi, Scholz tha se denoi luftën e Rusisë në Ukrainë, duke e ftuar Putinin të ndalë agresionin dhe të tërheqë trupat ruse nga territori ukrainas.
Po ashtu, ai theksoi rëndësinë e nisjes së negociatave me Kievin, për të arritur një paqe të drejtë dhe të qëndrueshme.
Rusia duhet të tregojë gatishmëri për të negociuar me Ukrainën me synimin për të arritur një paqe të drejtë dhe të qëndrueshme – shkroi Scholz në një postim në X.
Moska ka argumentuar se lufta në Ukrainë është një pasojë direkte e politikës agresive të aleancës perëndimore.
Presidenti Putin dhe zyrtarët rusë kanë akuza të përsëritura ndaj NATO-s, duke e cilësuar këtë aleancë si përgjegjëse për nisjen e agresionit rus në fillim të vitit 2022.
Por Volodymyr Zelensky ka paralajmëruar se biseda telefonike midis Olaf Scholz dhe Vladimir Putin do të hapë “Kutinë e Pandorës”.
Tani mund të ketë biseda të tjera, thirrje të tjera. Vetëm shumë fjalë. Dhe kjo është pikërisht ajo që Putini ka dashur prej kohësh: është jashtëzakonisht e rëndësishme që ai të dobësojë izolimin e tij, tha Zelensky.
Gatishmëria e kancelarit Scholz për t’u angazhuar në bisedime me presidentin Putin mund të shkaktojë zhgënjim në Ukrainë, pasi kjo e fundit po përballet me pasiguri të shtuar, veçanërisht pas fitores së Donald Trump në SHBA.
Ky zhvillim ka ngjallur shqetësime për mundësinë që administrata amerikane të ndërpresë ndihmën ushtarake për Ukrainën.
