Të tjera detaje kanë dalë në dritë në lidhje me vrasjen e 20-vjeçarit Stiven Toshkezi, që ndodhi 2 ditë më parë. I riu u godit për vdekje me thikë pas shpine afër gjimnazit Partizani. Ndërkohë për krimin në pranga ka rënë një prej autorëve, Enzi Maze, dhe është shpallur në kërkim shoku i tij, që mendohet se ka qenë dhe personi që e kreu plagosjen.
18-vjeçari Axel Hoxhaj ndodhet ende në arrati, por 18 – vjeçari i arrestuar ka folur para oficerëve të policisë versionin e tij si ndodhi ngjarja. Në dëshminë e Mazes në polici, shkruhet se ka thënë që shoku i tij ishte rrahur nga viktima më herët. 18-vjeçari ka thënë para grupit hetimor se shkak i sherrit mes dy të rinjve ishte bërë një vajzë që i pëlqente Axelit, e cila mësohet se ishte e dashura e 20-vjeçarit.
Duke u ndalur te nata kur ndodhi krimi, Maze pohoi se shoku i tij i kishte thënë se do të takonte Toshkesin për t’u sqaruar dhe jo për ta plagosur me thikë.
Enzi Maze ka shtuar se ka vetëm pak ditë që është kthyer nga Holanda ku është edhe me studime. Pasi ka takuar shokun e tij, Akselin ai i ka treguar se para disa kohësh ka pasur një konflikt me viktimën dhe pretendonte se ky i fundit e ka rrahur.
