Autoritetet në Santorini shpallën gjendjen e jashtëzakonshme të enjten, mes një serie tërmetesh që po tronditin ishullin dhe zonat përreth, përfshirë Amorgos, Anafi dhe Ios.
Situata alarmante ka shkaktuar panik tek banorët dhe vizitorët, të cilët po largohen nga ishulli.
Gjendja e jashtëzakonshme do të mbetet në fuqi deri më 1 mars, pasi lëkundjet e forta kanë rritur rrezikun e rrëshqitjeve të dheut dhe gurëve.
Vetëm gjatë natës së së mërkurës, u regjistruan gjashtë tërmete me magnitudë 4, ndërsa një goditje më e fortë, me magnitudë 5.2, u ndje në jug të Amorgos.
“Këto lëkundje të vazhdueshme po na lodhin. Sidomos mbrëmë, ishte e pandërprerë. Njerëzit janë të shqetësuar, por problemi më i madh është se nuk po mund të flemë,” tha kryebashkiaku i Anafit, Iakovos Poussos.
Situata është përkeqësuar edhe nga ndalimi i përkohshëm i trageteve për shkak të erërave të forta, duke izoluar banorët e ishujve pa aeroporte dhe duke rritur ndjenjën e pasigurisë.
“Në Amorgos ndjejmë lëkundjet edhe më shumë, pasi jemi më afër epiqendrës. Madje, edhe zhurma është shumë e dallueshme,” tha Stamatis Simos, nënkryetar i bashkisë së Amorgos.
Autoritetet po monitorojnë situatën nga afër, ndërsa banorët mbeten në gatishmëri për zhvillime të mëtejshme.
