Tirana do të jetë nesër mikpritësja e Samitit të Komunitetit Politik Evropian, një nga ngjarjet më të rëndësishme ndërkombëtare të zhvilluara në Shqipëri.
Për mbarëvajtjen dhe sigurinë e këtij samiti, janë angazhuar rreth 1500 efektivë policie nga struktura të ndryshme, përfshirë Antiterrorin, Policinë Rrugore, të Rendit, Krimeve si dhe Policinë Bashkiake.
Vetëm në zonën përreth sheshit “Skënderbej”, ku do të zhvillohet aktiviteti, do të pozicionohen rreth 600 efektivë që do të garantojnë sigurinë e delegacioneve dhe liderëve të lartë evropianë.
Në terren ndodhen edhe njësi të specializuara për çminimin dhe kontrollin e mjeteve eksplozive, të cilat janë në monitorim të përhershëm të rrugëve kryesore dhe të gjithë perimetrit të sigurisë.
Agjentë të Gardës së Republikës dhe të Shërbimit Informativ Shtetëror janë aktivizuar për të kontrolluar si situatën në terren, ashtu edhe aktivitetet e dyshimta në rrjetet sociale, për të parandaluar çdo tentativë për destabilitet.
Të gjitha pikat kufitare janë furnizuar me fotografi dhe të dhëna të personave me prirje ekstremiste, me qëllim ndalimin e hyrjes së tyre në territorin shqiptar.
Për garantimin e sigurisë janë angazhuar edhe ekspertë ndërkombëtarë, të cilët po asistojnë autoritetet shqiptare në shoqërimin dhe mbrojtjen me eskortë të liderëve dhe delegacioneve nga Aeroporti i Rinasit deri në vendndodhjen e samitit.
