“Ura e Zogut” në Milot, e cila është përshkruar si “Bukuroshja e Ballkanit”, ka pësuar dëmtime serioze dhe është gati për t’u shembur. Shkak për këtë janë bërë reshjet e dendura të shiut. Lumi mat është varfëruar nga marrja e zhavorreve dhe nuk ndalet më duke dëmtuar jo vetëm tokat, por edhe urat.
Dy javë më parë u raportua se reshjet e shiut kishin fundosur njërën nga këmbët e urës, por tashmë situata duket edhe më serioze.
Kompania “Salillari”, prej vitesh ngarkon kamionët me zhavorr në këtë lum, duke e thelluar edhe më tej degradimin e kësaj ure.
Pavarësisht kushteve natyrore jo të favorshme, dhe gërryerjes nga kompania “Salillari”, as shteti dhe institucionet përgjegjëse nuk kanë marrë masa mbrojtëse për ruajtjen e monumentit të kulturës.
Disa ditë më parë ishin banorët e fshatit Skuraj në Kurbin që tregonin se si kamionët e kësaj kompanie shkojnë natën dhe masakrojnë lumin Mat.
Ata denoncuan se këta kamionë gërryejnë lumin dhe mbushen me zhavorr, ndërsa në lum zbrazin mbetje të ngurta.
“Ka bërë një krim shumë të madh që lumi i Matit s’duhet të preket kurrë dhe ka marrë zhavorrin dhe ka hedhur inerte nga Tirana. Mbeturinat e Astirit që kanë prish pallatet i sjellin të mbushin lumin Mat pasi i marrin zhavorrin. Kërkoj nga firma Salillari të heqë dorë o të bëjë argjinaturë, jo të përmbytë tokën time. Këtu ka ardhur lartësia e ujit 1 metër. Nga 30 dynymë tokë, tani kam vetëm 3 dynymë”, është shprehur një nga banorët.
Banorët deklaruan se janë ankuar në bashkinë e Laçit dhe komunën e Milotit, të cilët u kanë thënë se kjo kompani nuk ka leje për të vepruar.
Kujtojmë se ky nuk është skandali i parë me kompaninë “Salillari”, pasi vetëm disa ditë më parë rruga e Borshit e ndërtuar nga kjo kompani u shkatërrua nga shiu për shkak të cilësisë së dobët të punimeve.
Por cilësia e dobët e punimeve e firmës “Salillari” ka dalë në pah edhe në aksin Çorovodë-Përmet, për të cilën kjo kompani ka përfituar 1.2 miliardë lekë për ndërtimin e këtij segmenti, që është dëmtuar nga reshjet e shiut./Gazetareforma.com/
