Dosja “Babalja” duket se nuk ka për të njohur fundin, pasi gjithmonë dalin detaje të reja. Ish- deputeti i Partisë Demokratike, Ervin Salianji, i përfshirë tashmë në këtë çështje, i thirrur nga Prokuroria edhe për të dëshmuar, tashmë ka bërë publik një tjetër audio-përgjime të rëndësishëm të “Babales”.
Në studion e “Opinion”, Salianji ka nxjerrë një telefonatë të regjistruar mes Alfred Alizotit, pra njeriut që ka pranuar se ka aktruar në zërin e Agron Xhafajt, dhe ish-drejtorit të Policisë, Albert Nushi.
Në këtë përgjim flitet për një “shef të madh”, i cili nuk përmendet me emër, megjithatë tregohet një situatë.
Sipas Salianjit në këtë përgjim të tretë, Alizoti kërkon që të takoj “shefin e madh për të marrë atë që i kanë premtuar”, por se kush është shefi i madh dhe gjeja e premtuar, kjo mbetet enigmë.
Ashtu siç e përmendëm ky është audio-përgjimi i tretë i bërë publik nga ish-deputeti, pasi disa ditë më parë ai ka publikuar edhe dy të tjerë, në të cilët flitej hapur për kreun e policisë, pra Albert Nushin dhe Kreun e Grupit Parlamentar të PS-së, Taulant Ballën.
