Ish-deputeti demokrat Ervin Salianji u paraqit sot në gjykatë për të dhënë shpjegime në lidhje me çështjen “Babale”.
Salianji tha se PD kishte informacione të vazhdueshme për përshirjen në trafik droge të Agron Xhafës, vëllait të ish-ministrit të Brendshëm, Fatmir Xhafaj.
Në lidhje me audiopërgjimin, midis Agron Xhafajt dhe Albert Veliut, ish-deputeti tha se e kishte marrë denoncimin nga gazetari Jetmir Olldashi.
Më tej Salianji shtoi, se Veliu i kishte thënë se kishte frikë për jetën, shkruan “Panorama”.
“Për Geron Xhafën, mora një denoncim të ri nga gazetari Jetmir Olldashi. Ai më tha se ishte duke bërë një investigim të madh, që kishte lidhje me qeverinë. Meqë unë jam marrë me denoncimin e bandave, ma solli mua. Materialin audio e kam marrë disa muaj para publikimit, ishte në CD, ose USB. Në këtë material ishte vëllai i ish ministrit me Albert Veliun. Edhe tabulatet telefonike e vërtetojnë që unë kam folur me Jetmir Olldashin e më pas me Albert Veliun. Pas publikimit të materialit kam patur kontakte me të dhe familjarët, pasi Veliu më ka thënë se ishte në rrezik për jetën. Sa herë kishte kontakte me persona të ligjit ai më shprehte shqetësim”, tha në dëshminë e tij ish-deputeti demokrat.
Ish-deputeti iu përgjigj edhe shumë pyetjeve të drejtuara nga avokati Ardian Visha, i cili mbron interesat e Agron Xhafajt.
Salianji tha se Albert Veliu ishte person i besueshëm, pasi kishte bërë burg me vëllanë e ish-ministrit.
Më tej ish-deputeti akuzoi Vishën, duke i thënë se ka ndaluar ekstradimin e Xhafës, në kohën kur ishte drejtor i marrëdhënieve me jashtë në Prokurorinë e Përgjithshme.
“Ti je i akuzuar që s’ke lejuar esktradimin kur ke qenë drejtor i marrëdhënieve me jashtë në prokurori. Ti je në konflikt interesi dhe je po njësoj llum, i korruptuar dhe pjesë e një sistemi të kalbur dhe vicioz që ndërhyni në gjykata prokurori dhe kudo”, vijoi Salianji.
Ky debat i fortë u bë shkak për ndërprerjen e seancës.
Në daljen nga gjykata, Salianji tha se denoncimet e tij, provuan lidhjet e qeverisë me mafian.
Kujtojmë këtu se Ervin Salianji, Jetmir Olldashi, dhe Fredi Alizoti, po përballen me akuzën e “Kallëzimit të rremë”.
Përsa i përket personazhit kryesor, Albert Veliut, prokuroria mbetet në pritje të një përgjigje nga Belgjika, nëse do ta ekstradojë apo jo. “Babales” ndërkohë i është refuzuar kërkesa për azil, duke i hapur rrugë ekstradimit.
