Ditën e sotme është shtyrë për herë të tretë seanca gjyqësore për ish-ministrin e punëve të Brendshme, Saimir Tahirin.
Këtë moskorrektësi, Tahiri ka zgjedhur ta ironizojë nëpërmjet një fotoje në rrjetin social Instagram.
Në këtë mënyrë, Tahiri është bërë dashur pa dashur edhe pjesë e sfidës më të re në rrjetet sociale “FaceApp”, ku të gjithë mund ta shohin se si do të duket kur të plaket.
Duke pritur gjyqin…. Nje gjyq qe duhet te ishte shembull korrektese e profesionalizmi, u shty edhe sot. Hera 1re u shty se posta padashje kishte grisur letrat.
Hera e 2te se polici nuk kishte bere njoftimet. Hera e 3te (sot) se Prokuroria kishte humbur ca letra e nuk i gjente dot. Letrat me te cilat kerkoi arrestimin tim ne parlament, sot i kishin humbur.
QESHARAAAAAKE!!!!!”, është ky postimi i ish-ministrit Tahiri në rrjetin social Instagram.
Shkak për shtyerjen e seancës së sotme gjyqësore është bërë mungesa e disa dokumenteve prova ndaj Moisi Habilajt.
Kjo ka qenë ajo që e ka nxitur edhe më shumë reagimin e Tahirit. Ai ka thënë sesi mund të humbasin letra të një rëndësie të tillë, në të cilat u bazua kërkesa për arrestimin e tij.
Pas seancës Saimir Tahiri u shpreh se kjo është hera e tretë që shtyhet seanca, edhe një çerdhe kalamajsh është më e organizuar sesa kaq, nuk e di si mund të humbasin letrat në Prokurori, kur ka një protokoll.
“Unë nuk e di si Prokuroria me të njëjtat letra kërkoi arrestimin tim, kjo është qesharake, unë nuk e di nëse kjo është e qëllimshme apo gabim njerëzor.
Nëse është e qëllimshme, kjo është e keqja më e vogël, unë shpresoj që të jetë mungesë vëmendje, madje nuk dua aq që ti vë një emër kësaj. Edhe pse ato prova ishin në favorin tim, unë heq dorë dhe nga ato, mjafton që gjyqi të mos shtyhet”, është shprehur para kamerave Tahiri.
