Ministrja e Shëndetësisë, Ogerta Manastirliu ka thënë se 70% e rasteve me COVID në Shqipëri janë të variantit britanik sipas një kampionimi të bërë. Në emisionin Opinion ajo foli gjithashtu për rastet e riinfektimeve, duke thënë se deri tani në Shqipëri ka pasur 28 raste të tilla.
“Aktualisht është bërë një kampion ku vlerësohet që janë 70% e rasteve të marra sipas kritereve…Kemi disa të dhëna në raport me riinfektimet. Riinfektim quhet ai rast ai që infektohet tre muaj pasi është konfirmuar njëherë pozitiv është konfirmuar negativ me tampon dhe riinfektohet sërish, por gjatë periudhës nuk ka pasur shenja të COVID. Deri më tani kemi 28 raste të riinfektimeve në Shqipëri.”-tha Manastirliu.
Ministrja ka folur edhe për pacientët që janë në intubim duke thënë se rastet kur ata dalin nga intubimi janë të pakta.
“Janë raste të cilat fatkeqësisht në përqindjen më të lartë shkojnë drejt fataliteteve, sepse nuk është vetëm intubimi. Është fakti që ka lidhje me sëmundjen dhe sëmundjet e tjera që shoqërojnë më pas, që agravon vetë Covid-i, si sëmundjet kardiovaskuale etj. Pra sëmundje të tjera që shoqërojnë dhe bëjnë prekje multiorganore dhe këto pastaj sjellin fatalitetet. Bëhet një përpjekje gjigande nga mjekët…Ne kemi pak raste të cilat kanë dalë nga intubimi, por po themi përqindja e nuk është e konsiderueshme”- tha ajo.
