Një aferë e madhe e ndodhur në OSHEE është goditur sot nga SPAK.
Drejtorja e Divizionit Tregtar dhe njëkohësisht Drejtorja e Kabinetit të Ardian Çelës, numrit një të OSHEE, është vënë në pranga sepse kishte marrë 131.880 euro ryshfet, për të favorizuar një kompani të caktuar.
Shkelja në tender dhe ryshfeti
Më konkretisht, Albana Ferraj, pas ryshfetit të marrë, ka favorizuar shoqërinë tregtare ‘COM METODI’ S.P.A, me seli në Milano të Italisë, në proçedurën e prokurimit të zhvilluar në vitin 2016.
Në objekt të hetimeve ka qenë tenderi ‘Shërbim-Konsulence’, për lidhjen e kontratës me kompaninë italiane. Objekt i tenderit ka qenë “Asistencë teknike për ndarjen e aktivitetit të shpërndarjes së energjisë elektrike nga furnizimi i energjisë elektrike së bashku me përmirësimin e cilësisë së shërbimit të klientit të OSHEE sh.a”, me fond limit 1.385 miliardë lekë. Tenderi është zhvilluar në vitin 2016.
Ndërkohë, nga këto veprime hetimore janë parë dyshime të bazuara në prova se shtetasit Elis Bushati, ish-drejtor i Komisionit të Vlerësimit të Ofertave, dhe anëtaret Athinta Papa dhe Irma Dërguti, kanë kryer veprime në kundërshtim me ligjin, duke favorizuar në mënyrë të padrejtë shoqërinë italiane.
Përmbyllja e hetimeve
Duke parë këtë ryshfet dhe gjithë procedurat jashtë rregullave për tenderët, SPAK kishte nisur hetimet prej muajsh, dhe sot u bë arrestimi i Elis Bushatit.
Në kërkim është drejtoresha e kabinetit, Albana Ferraj, ndërkohë që masa ‘arrest shtëpie’, është dhënë për Athinta Papa dhe Irma Dërguti.
- “Arrest me burg” është vendosur për Albana Ferrajn, si e dyshyar për veprat penale: “Korrupsion pasiv i personave që ushtrojënë funskione publike” dhe “pastrim i produkteve të veprimtaris kriminale”.
- “Arrest me burg” për Elis Bushatin për veprën penale “Shkelja e barazisë së pjesëmarrësve në tendera apo ankande publike”.
- “Arrest në shtëpi” për Irma Dërgutin, për veprën penale “Shkelja e barazisë së pjesëmarrësve në tendera apo ankande publike”.
- Arrest në shtëpi dhe për Athinta Papan, për veprën penale “Shkelja e barazisë së pjesëmarrësve në tendera apo ankande publike”.
/GazetaReforma.com/
