Al Jazeera raporton se Rusia është vendi i tretë në botë për numrin më të lartë të viktimave. Vetë Rusia deklaron se numri i përgjithshëm i viktimave nga coronavirusi ishte tre herë më i lartë, sesa ishte raportuar më parë.
Për muaj me radhë, presidenti rus, Vladimir Putin, është shprehur me mburrje për shkallën e ulët të vdekjeve në Rusi nga coronavirusi, duke u proklamuar në fillim të këtij muaji se kishte bërë një “punë më të mirë” se sa vendet perëndimore për sa i përket menaxhimit.
Ekspertët, përfshirë profesionistët mjekësorë dhe shkencëtarët e të dhënave, i kanë vënë në dyshim statistikat zyrtare për muaj me radhë, duke akuzuar njëherësh qeverinë për fshehjen e rasteve në vend.
Të hënën, zyrtarët rusë e pranuan se ishte e vërtetë.
Agjencia e statistikave Rosstat tha se numri i viktimave nga të gjitha shkaqet, të regjistruara midis muajit janar dhe nëntor, ishte rritur në 229 mijë, krahasuar me vitin e kaluar.
“Më shumë se 81 për qind e rritjes së mortalitetit gjatë kësaj periudhe është për shkak të COVID-19”, tha zëvendëskryeministrja Tatyana Golikova, që do të thotë se rreth 186 mijë rusë kanë vdekur nga coronavirusi gjatë vitit 2020.
Një problem i ngjashëm ndodhi në Shqipëri, ku opozita akuzoi qeverinë se fsheh numrin e vërtetë të viktimave. pas kësaj, fotot e dala nga Klinika e Mjekësisë Ligjore përforcuan këtë opinion. Më pas shifrat zyrtare ditore të vdekjeve nga Covid u dyfishuan.
/Gazetareforma.com/
