Rusia ka prezantuar zhvillimin e një vaksine të re kundër kancerit, e cila sipas autoriteteve ka dhënë rezultate shumë inkurajuese në testimet klinike. Vaksina, e quajtur “Enteromix”, bazohet në teknologjinë mRNA dhe thuhet se ka arritur 100% efektivitet dhe siguri gjatë fazës së provave.
Mediat ndërkombëtare raportojnë se trajtimi jo vetëm synon të neutralizojë qelizat kancerogjene, por ka treguar gjithashtu aftësi për të zvogëluar tumoret e mëdha. Aktualisht, vaksina është në pritje të miratimit përfundimtar nga Ministria Ruse e Shëndetësisë, me synimin që të vihet në dispozicion të pacientëve.
Alexander Ginzburg, drejtor i Qendrës Kombëtare të Kërkimeve për Epidemiologjinë dhe Mikrobiologjinë “NF Gamalei”, deklaroi në fillim të gushtit se vaksina tashmë ka nisur të administrohet te një grup pacientësh të përzgjedhur. Ajo është ndërtuar mbi bazën e informacionit gjenetik personal të secilit pacient, duke e bërë një trajtim të personalizuar dhe më pak të rëndë krahasuar me metodat tradicionale si kimioterapia dhe radioterapia.
Sipas Ginzburg, vaksina përdor “neoantigjene” të dizajnuara posaçërisht për çdo pacient, duke e “stërvitur” sistemin imunitar që të njohë dhe shkatërrojë qelizat kancerogjene. Ai theksoi se gjatë provave nuk janë raportuar efekte anësore serioze dhe trajtimi është toleruar mirë nga pacientët.
Vaksina po testohet fillimisht te pacientë me melanomë, në bashkëpunim me Institutin Onkologjik “Gertsen” në Moskë dhe Qendrën Kombëtare të Kërkimeve Mjekësore të Onkologjisë “Blokhin”. Prodhimi i saj po kryhet ekskluzivisht nga Qendra Gamalei.
Më herët, edhe Qendra Federale Klinike Shkencore e Radiologjisë Mjekësore dhe Onkologjisë në Dimitrovgrad kishte njoftuar për zhvillimin e një vaksine terapeutike për trajtimin e formave të avancuara të kancerit.
Sipas planeve të autoriteteve ruse, vaksina “Enteromix” do të ofrohet falas për qytetarët rusë, ndërsa provat klinike për përzgjedhjen e pacientëve nisën në dhjetor 2024.
