Ish-kryetari i Partisë Demokratike, Lulzim Basha ka reaguar në lidhje me deklaratën e zyrtarit të SHBA se Rusia ka financuar Partinë Demokratike të Shqipërisë me një shumë prej 500 mijë dollarësh në vitin 2017. Përmes një reagimi në Tëitter, Basha është shprehur se forca politike që ai drejtonte asokohe “nuk ka marrë kurrë asnjë financim të huaj e aq më pak me burim rus”.
Basha deklaron se menjëherë pas qarkullimit nëpër media të pretendimeve për financimin rus, Partia Demokratike i ka kërkuar përmes një shkrese zyrtare drejtësisë që të hetojë këto akuza të rënda. Ai shprehet se krahas denoncimit ka bashkëpunuar plotësisht me drejtësinë për të zbardhur ngjarjen, por instancat e drejtësisë e hodhën poshtë çdo pretendim për financime të huaja.
“Partia Demokratike nuk ka marrë kurrë asnjë financim të huaj e aq më pak me burim rus. Kur pretendime të tilla u qarkulluan në disa media, Partia Demokratike i kërkoi zyrtarisht drejtësisë hetimin e këtyre akuzave dhe bashkëpunoi plotësisht me drejtësinë e cila hodhi poshtë çdo pretendim për financime të huaja. Ne jemi krenarë për partneritetin e palëkundur me aleatin tonë strategjik, SHBA dhe të vendosur të ecim përpara në krah të aleatëve tanë euro-atlantikë për konsolidimin e vlerave perëndimore dhe integrimin e Shqipërisë në Bashkimin Europian”, deklaron Lulzim Basha.
