Tashmë është bërë publik fakti se Rudina Hajdari ka hequr dorë nga djegia e mandatit, mirëpo nuk është kursyer edhe me kritika si ndaj Partisë Demokratike ashtu edhe ndaj asaj të Lëvizjes Socialiste për Integrim.
Në një intervistë për Zërin e Amerikës, ajo ka thënë se e ka shumë të vështirë që të luftojë përkrah LSI-së, pasi sipas saj në raportet e OSBE-së kjo parti ka pasur shumë probleme.
“Synimi im ka qenë gjithmonë të përmirësojmë sistemin. Edhe nëse më përpara unë shpreha dëshirë për tu bërë pjesë me studentët, ka qenë sepse unë doja ta përmirësoja sistemin. Dhe jo ta rrëzoja sistemin. Ne nuk mund të parashikojmë dot se çfarë rreziku do ti sjellë ky vendim Partisë Demokratike. E kam shumë të vështirë të luftojnë në krah të LSI, nuk e bëj dot sepse është një çështje parimore. Po të hapësh raportet e OSBE kjo parti ka pasur shumë probleme kur vjen fjala për këtë fenomen”, deklaroi zonja Hajdari.
Gjithashtu Hajdari ka thënë së nuk ka pasur asnjë kontakt me Partinë Demokratike rreth vendimit që ka marrë.
“Edhe po të isha në atë mbledhje do parashtroja dy gjëra, që ky vendim për të dorëzuar mandatet në bllok nga të gjithë deputetët e opozitës dëmton interesin e Shqipërisë. E para dëmton proceset integruese në BE, por dëmton dhe marrëdhëniet tona me partnerët. Vendimi është marrë në mënyrë rrufe, ky vendim mund të na çojë në destabilitet”.
Ndërsa përsa i përket përjashtimit të anëtarëve, ajo ka thënë se kjo nuk është hera e parë, pasi babin e saj, të ndjerin Azem Hajdari, PD-ja e ka përjashtuar dy herë, edhe pse më vonë është penduar për veprimin e bërë.
“Dua ti kujtoj PD-së që nuk është hera e parë që përjashton anëtarë, ka ndodhur me tim atë, dy herë dhe më duhet të theksoj se ata janë penduar. Im atë është kryetari historik i PD-së. Ai është përjashtuar dy herë nga PD dhe PD-ja është penduar. Duhet të jemi shumë të matur para se të marrim këto lloj vendimesh“.
