Gjykata e Posaçme ka dënuar me 10 muaj burg Aleksandër Lahon, i njohur edhe me emrin Pellumb Muharremi, për akuzën e korrupsionit.
SPAK kërkoi dënim prej 3 vitesh burg, por gjykata e shpalli fajtor dhe e dënoi me 1 vit e 3 muaj burg. Pasi u mor parasysh gjykimi i shkurtuar, dënimi iu ul me një të tretën.
Hetimet e Prokurorisë kanë zbuluar se Laho ka dhënë 600 mijë lekë zyrtarit të Avokatit të Shtetit, Irgen Kërçuku, dhe ka premtuar edhe 300 mijë lekë të tjera për të parandaluar ankimimin e një çështje pronësie.
Sipas SPAK, Laho e ka dhënë ryshfetin për mosankimin në Apel të një çështje lidhur me tjetërsimin e 45 mijë metrave katrorë tokë publike në Gjirin e Lalzit.
Laho ka qenë i përfshirë në një atentat në vitin 2019, ku u plagos rëndë, dhe iu sekuestrua telefoni, ku u zbuluan komunikimet me Kërçukun.
Ky i fundit është dënuar me 2 vite burg për korrupsion.
Ndërkohë, Laho është shpallur në kërkim, ndërsa avokati i tij ka pretenduar se gjendja e tij shëndetësore është e rënduar pas atentatit, ku mbeti i dëmtuar fizikisht.
Në atentat pati edhe viktima, pasi shoferi i prokurorit Arjan Ndoja, Andi Maloku, humbi jetën. Hetimet e SPAK zbardhën komunikimet në Sky ECC dhe arritën të identifikojnë autorët e atentatit, përfshirë Plaurent Dervishajn.
