Punimet për ndërtimin e rrugës turistike të Thethit sapo kanë nisur.
Ka qenë vetë kryeministri Edi Rama, që e ka bërë të ditur nëpërmjet një postimi në rrjetet sociale.
Shefi i qeverisë e ka cilësuar këtë projekt, si një mbështetje për banorët e zonës, të cilët e kanë kthyer mikpritjen në burim ekonomik.
Më tej Rama ka dërguar edhe një mesazh, për ata persona që përqeshnin videoprojektin në 3D të rrugës, duke u thënë të bëhen burra e të mos shkelin aty.
Kryeministri ka bërë me dije gjithashtu, se afati për përfundimin e punimeve, do të jetë korriku i vitit 2020.
Postimi i Ramës
JA EDHE KANTIERI I SAPONGRITUR i rrugës turistike të Thethit, ku pas 30 vjetësh premtime e zhgënjime ka nisur puna, tamam siç ishim zotuar, për t’i dhënë një shtysë të fortë zhvillimit të turizmit malor në Qarkun e Shkodrës, si edhe një mbështetje të madhe banorëve të asaj zone të bekuar, të cilët edhe pse thuajse të izoluar nga bota, kanë ndërtuar me mund e mençuri një model biznesi të admirueshëm duke e kthyer traditën e mikpritjes në burim ekonomik.
- Rruga e re nis në Qafë Thore e përfundon në qendrën e Thethit
- Afati per realizimin e punimeve 10 Muaj – Korrik 2020
- Ata që para disa javësh në këtë faqe e përqeshnin postimin e videoprojektit të kësaj rruge turistike në 3D, të bëhen “burra” e të mos shkelin kurrë në këtë rrugë.”
