Dy ditë më parë kryeministri Edi Rama ka premtuar shpërblim për pensionistët dhe rritje të pagës mesatare në vendin tonë. Teksa ndodhemi në prag të zgjedjeve lokale, këto premtime të kryeministrit janë parë dhe komentuar me shumë skepticizëm.
Gazetari Enton Abilekaj ka debatuar me Sekretarin Organizativ të Partisë Socialiste, Blendi Klosi, në emisionin “Të Paekspozuarit” në MCN TV, lidhur me zgjedhjet lokale dhe përpjekjet e qeverisë për të joshur votuesit.
Sipas Abilekajt, premtimet e kryeministrit Rama janë një masë elektorale, ndërkohë që inflacioni po bie. Sipas gazetarit, qeveria nuk mori këto masa ndërkohë që çmimet u rritën në “stratosferë”.
Debati:
Blendi Klosi: Ne përgatitemi për garën. PS punon dhe në datën 15 maj ne fillojmë punën për të fituar zgjedhjet e 2025. Do të jemi prapë këtu, se ju qeshët dhe ne do të fitojmë prapë.
Enton Abilekaj: Ju jeni makineri elektorale, nuk e mohojmë. Por, të deklarosh shpërblim dhe rritje pagash në vit elektoral, do të thotë që nuk po punoni për zgjedhjet por po i blini zgjedhjet. Të shpërndash para për tërmetin në 2021, dy muaj para zgjedhjeve, tregon se po i ble zgjedhjet.
Blendi Klosi: Do të isha dakord që përfaqësues të opozitës të ngrinin këtë temë në Parlament dhe të japim argumentat. Në kohën kur mund të bënin këtë punë ata merren me njëri tjetrin. Ky nuk është faji i Ramës dhe i PS-së që punon dhe programon dhe paraqitet në garë.
Enton Abilekaj: Rrogat nuk i ngre dot opozita.
Blendi Klosi: Rritja e pagave dhe pensioneve dhe rritja e mirëqenies së qytetarëve është mision dhe prioriteti ynë si forcë politike.
Enton Abilekaj: Nuk e keni bërë deri tani, e bëni për zgjedhje. Rrisni pagat dhe jepni shpërblim, ndërkohë që inflacioni po bie. Kjo është masë elektorale. Kur u rritën vërtetë çmimet ju nuk dhatë asnjë lekë!
Blendi Klosi: Rritja e çmimeve nuk kishte lidhje me Shqipërinë, ndodhi pa luftës në Ukrainë. Qeveria merr përditë masa dhe këtë punë ka qeveria.
